Sanchar Saathi App જાસૂસી એપ...": કોંગ્રેસ નેતા પ્રિયંકા ગાંધીએ સરકાર પર કર્યા પ્રહારો, જાણો ભાજપે શું કહ્યું?

Sanchar Saathi App જાસૂસી એપ…”: કોંગ્રેસ નેતા પ્રિયંકા ગાંધીએ સરકાર પર કર્યા પ્રહારો, જાણો ભાજપે શું કહ્યું?

Sanchar Saathi App: ભારત સરકારે દરેક મોબાઇલ ફોનમાં સંચાર સાથી એપ (Sanchar Saathi App) ફરજિયાત બનાવી દીધી છે. ટેલિકોમ્યુનિકેશન વિભાગ (DoT) એ તમામ મોબાઇલ ઉત્પાદક કંપનીઓને નવા ફોનમાં ‘સંચાર સાથી’ એપ પ્રીલોડ કરવાનો નિર્દેશ આપ્યો છે, જેને ન તો દૂર કરી શકાય છે અને ન તો ડિસેબલ કરી શકાય છે. સરકારના આ નિર્ણય પર વિપક્ષે પ્રશ્નો ઉઠાવવાનું શરૂ કર્યું છે.

“સંચાર સાથી એપ” હવે બધાના મોબાઈલમાં હશે

ભારતમાં હવે બધા નવા મોબાઇલ ફોનમાં “સંચાર સાથી એપ” પહેલાથી ઇન્સ્ટોલ કરેલી હશે. સરકારના ટેલિકોમ્યુનિકેશન વિભાગે એક નિર્દેશ જારી કર્યો છે જેમાં મોબાઇલ હેન્ડસેટની અધિકૃતતા ચકાસવા માટે મોબાઇલ ફોન પર “સંચાર સાથી એપ” પહેલાથી ઇન્સ્ટોલ કરવાની જરૂર છે.

90 દિવસની અંદર એપ ઇન્સ્ટોલ કરવાનો નિર્દેશ

સરકારે ભારતના તમામ મોબાઇલ હેન્ડસેટ ઉત્પાદકોને 90 દિવસની અંદર આ એપ ઇન્સ્ટોલ કરવાનો નિર્દેશ આપ્યો છે. તેમજ ટેલિકોમ્યુનિકેશન વિભાગના નિર્દેશમાં જણાવાયું છે કે જો કંપનીઓ તેનું પાલન કરવામાં નિષ્ફળ જાય, તો ટેલિકોમ્યુનિકેશન એક્ટ 2023 અને ટેલિકોમ્યુનિકેશન સાયબર સુરક્ષા નિયમો 2024 ની જોગવાઈઓ હેઠળ કાર્યવાહી કરવામાં આવશે.

કે.સી. વેણુગોપાલે શું કહ્યું ?

કોંગ્રેસના મહાસચિવ કે.સી. વેણુગોપાલે કહ્યું હતું કે ગોપનીયતાનો અધિકાર જીવન અને સ્વતંત્રતાના મૂળભૂત અધિકારનો અભિન્ન ભાગ છે. તેમણે કહ્યું હતું કે, “ટેલિકોમ્યુનિકેશન વિભાગનો આ નિર્દેશ ગેરબંધારણીય છે. ગોપનીયતાનો અધિકાર બંધારણના અનુચ્છેદ 21 માં સમાવિષ્ટ જીવન અને સ્વતંત્રતાના મૂળભૂત અધિકારનો અભિન્ન ભાગ છે. પહેલાથી ઇન્સ્ટોલ કરેલી સરકારી એપ્લિકેશન, જેને દૂર કરી શકાતી નથી, તે દરેક ભારતીય પર નજર રાખવા માટે એક દમનકારી સાધન છે. તે દરેક નાગરિકની દરેક પ્રવૃત્તિ, વાતચીત અને નિર્ણય પર નજર રાખવાનું એક માધ્યમ છે.”

પ્રિયંકા ગાંધીએ શું કહ્યું?

કોંગ્રેસના નેતા પ્રિયંકા ગાંધીએ કહ્યું કે સંચાર સાથી એપ માત્ર ગ્રાહક સુરક્ષા સાધન નથી પરંતુ તે “જાસૂસી પ્રણાલી” ના ભાગ રૂપે ઉભરી રહી છે જે નાગરિકોના અંગત જીવનમાં અભૂતપૂર્વ ઘુસણખોરીને મંજૂરી આપે છે.પ્રિયંકા ગાંધીએ કડક શબ્દોમાં કહ્યું, “સંચાર સાથી એક જાસૂસી એપ્લિકેશન છે, અને સ્પષ્ટપણે કહું તો, તે મજાક છે. નાગરિકોને ગોપનીયતાનો અધિકાર છે. દરેક વ્યક્તિને સરકાર દ્વારા ટ્રેક કર્યા વિના પરિવાર અને મિત્રોને સંદેશા મોકલવાની ગોપનીયતા હોવી જોઈએ.”પ્રિયંકા ગાંધીએ આરોપ લગાવ્યો કે આ ફક્ત મોબાઇલ ફોનની દેખરેખ સુધી મર્યાદિત નથી, પરંતુ સરકાર એક એવું માળખું ગોઠવી રહી છે જે લોકશાહી સંસ્થાઓને નબળી પાડશે. “આ ફક્ત ટેલિફોન જાસૂસી નથી. તેઓ આ દેશને દરેક રીતે સરમુખત્યારશાહીમાં ફેરવી રહ્યા છે. સંસદ કાર્યરત નથી કારણ કે સરકાર કંઈપણ ચર્ચા કરવાનો ઇનકાર કરે છે. વિપક્ષને દોષ આપવો સરળ છે, પરંતુ તેઓ કોઈ પણ ચર્ચા થવા દેતા નથી, અને તે લોકશાહી નથી.”

વિપક્ષ પાસે કોઈ મુદ્દો નથીઃ કિરણ રિજીજૂ

સંચાર સાથી એપને લઈને ચાલી રહેલા વિવાદ વચ્ચે, કેન્દ્રીય સંસદીય બાબતોના મંત્રી કિરેન રિજિજુએ મંગળવારે વિપક્ષ પર નિશાન સાધ્યું, અને આરોપ લગાવ્યો કે તે દરેક બાબતને મુદ્દો બનાવી રહી છે. તેમણે કહ્યું કે સરકાર ઘણા મોરચે મુદ્દાઓ પર ચર્ચા કરવા તૈયાર છે, પરંતુ વિપક્ષ જાણી જોઈને સતત “નવા મુદ્દાઓ” ઉભા કરીને સંસદની કાર્યવાહીમાં વિક્ષેપ પાડવાનો પ્રયાસ કરી રહ્યું છે. તેમણે કહ્યું કે વિપક્ષે દરેક મુદ્દાને હથિયાર ન બનાવવો જોઈએ.